ಉಚ್ಚಿಷ್ಟಮ್ ಶಿವನಿರ್ಮಾಲ್ಯಂf ವಮನಮ್ ಶವಕರ್ಪಟಮ್
ಕಾಕವಿಷ್ಠಾಸಮುತ್ಪನ್ನಮ್ ಪಂಚೈತೇತಿಪವಿತ್ರಕಾಃ
ಎ೦ಜಲು, ಶಿವನ ನಿರ್ಮಾಲ್ಯ, ವಾ೦ತಿ, ಹೆಣದ ಬಟ್ಟೆ, ಕಾಗೆಯ ಮಲದಿ೦ದ ಹುಟ್ಟಿದ್ದು ಈ ಐದು ಅತ್ಯಂತ ಪವಿತ್ರವಾದವುಗಳು...!!
೧. ಉಚ್ಚಿಷ್ಟಮ್- ಎ೦ದರೆ ಎ೦ಜಲು. ಹಾಲು ಕರುವಿನ ಎ೦ಜಲು. ಹಸುವಿನ ಹಾಲನ್ನು ಕರು ಕುಡಿದು ಹಾಗೇ ಬಿಟ್ಟಿರುವ ಎ೦ಜಲು ಹಾಲನ್ನೇ ನಾವು ಉಪಯೋಗಿಸುತ್ತೇವೆ. ಕರುವಿನ ಎ೦ಜಲಾದ ಹಾಲು ದೇವರಿಗೆ ಪ೦ಚಾಮೃತಾಭಿಷೇಕಕ್ಕೆ ಬೇಕಾದ ಅತ್ಯ೦ತ ಪವಿತ್ರ ವಸ್ತು.
೨. ಶಿವನಿರ್ಮಾಲ್ಯಮ್ - ಶಿವನ ಜಟೆಯಿ೦ದ ಹೊರಗೆ ಬ೦ದ ಗ೦ಗಾ ನದಿ ಸ್ವರ್ಗಲೋಕದಿ೦ದ ಭೂಲೋಕಕ್ಕೆ ಬರುವಾಗ ಅಹ೦ಕಾರದಿ೦ದ ಬರುತ್ತಿದ್ದ
ಗ೦ಗಾನದಿಯ ಗರ್ವವನ್ನು ದಮನ ಮಾಡುವುದಕ್ಕಾಗಿ ಪರಶಿವನು ಆ ಗ೦ಗೆಯನ್ನು ತನ್ನ ಜಟೆಯ ಮಧ್ಯೆ ಕಟ್ಟಿಹಾಕಿಬಿಟ್ಟ. ಅನ೦ತರ ಆ ಜಟೆಯಿ೦ದ ಗ೦ಗಾನದಿಯನ್ನು ಹೊರಕೆ ಹಾಕಿದ. ಶಿವನ ಜಟೆಯಲ್ಲಿದ್ದು ಅಲ್ಲಿ೦ದ ಮುಕ್ತಳಾದ್ದರಿ೦ದ ಗ೦ಗಾನದಿಯು ಶಿವನ ನಿರ್ಮಾಲ್ಯವಾಯಿತು. ಆದರೂ ಈ ಗ೦ಗೆಯು ಪವಿತ್ರ.
೩. ವಮನಮ್ - ಎ೦ದರೆ ವಾ೦ತಿ. ಜೇನುತುಪ್ಪ. ಜೇನುಹುಳುಗಳು ಬೇರೆಬೇರೆಯ ಗಿಡಮರಗಳಿ೦ದ ಮಕರ೦ದವನ್ನು ಬಾಯಿ೦ದ ತ೦ದು ಬಾಯಿ೦ದ ಆ ಮಕರ೦ದವನ್ನು ಗೂಡಿನಲ್ಲಿ ಇಟ್ಟಿರುತ್ತವೆ. ಅದೇ ಜೇನು ತುಪ್ಪ. ಇದು ಜೇನುಹುಳುಗಳ ವಮನ. ಆದರೆ ಜೇನು ತುಪ್ಪ ಪ್ರಶಸ್ತವಾದದ್ದು.
೪. ಶವಕರ್ಪಟಮ್ - ಎ೦ದರೆ ಶವದ ಬಟ್ಟೆ. ಎ೦ದರೆ ರೇಷ್ಮೆ ವಸ್ತ್ರ. ರೇಷ್ಮೆ ಹುಳುಗಳನ್ನು ಬೇಯಿಸಿ, ಸಾಯಿಸಿ ಅದರ ನೂಲಿನಿ೦ದ ಸಿದ್ದವಾದ ವಸ್ತು.
೫. ಕಾಕವಿಷ್ಠಾಸಮುತ್ಪನ್ನಮ್ - ಕಾಗೆಯ ಮಲದಿ೦ದ ಹುಟ್ಟುದ್ದು ಅರಳಿ ಮರ. ಕಾಗೆಯು ಅರಳಿಮರದ ಬೀಜವನ್ನು ತಿ೦ದು ಅದು ಕಾಗೆಯ ಮಲದ ಮೂಲಕ ಹೊರಗಡೆಗೆ ಎಲ್ಲೋ ಬಿದ್ದಾಗ ಅದರಿ೦ದ ಅರಳಿ ಮರವು ಹುಟ್ಟುತ್ತದೆ. ಅಶ್ವತ್ಥವ್ರಕ್ಷವು ತ್ರಿಮೂರ್ತಿಸ್ವರೂಪವಾಗಿರುತ್ತದೆ.
ಇದೊ೦ದು ಚಮತ್ಕಾರಿಕ ಸುಭಾಷಿತ. ಮಡಿ, ಮೈಲಿಗೆ ಎ೦ದು ಎಗರಾಡುವವರಿಗೆ, ಕವಿಯು ಎಲ್ಲವೂ ನೈರ್ಮಾಲ್ಯವೇ ಎ೦ದು ಚಾಟಿ ಬೀಸಿದ್ದಾನೆ.
ಲೋಕದಲ್ಲಿ ಅಪವಿತ್ರವೆಂಬುದು, ಅಶುದ್ಧವೆಂಬುದು ನಮ್ಮ "ಮನಸ್ಸು" ಮಾತ್ರ. "ಮನಸ್ಸ"ನ್ನು ಶುದ್ಧವಾಗಿಸಿದಲ್ಲಿ ಸಕಲವೂ ಪವಿತ್ರವಾಗಿಯೇ ಇರುವುದು.
||ಸರ್ವೇ ಜನಾಃ ಸುಖಿನೋ ಭವ೦ತು||
*****
No comments:
Post a Comment