ಆದರ್ಶ ವ್ಯಕ್ತಿಯ ಗುಣಗಳು

ನಾರದರು ಆದರ್ಶ ವ್ಯಕ್ತಿಯೆಂದು ಕರೆಸಿಕೊಳ್ಳಲು ವ್ಯಕ್ತಿಯು ಹೊಂದಿರಬೇಕಾದ 16 ಗುಣಗಳನ್ನು ಹೀಗೆ ತಿಳಿಸಿದ್ದಾರೆ:

1. ಗುಣವಾನ್ – ನೀತಿವಂತರು

2. ವೀರ್ಯವಾನ್- ಶೂರರು

3. ಧರ್ಮಜ್ಞ – ಧರ್ಮವನ್ನು ತಿಳಿದವರು

4. ಕೃತಜ್ಞ – ಮಾಡಿದ ಸಹಾಯ/ಉಪಕಾರವನ್ನು ನೆನಪಿನಲ್ಲಿಟ್ಟುಕೊಳ್ಳುವವರು

5. ಸತ್ಯವಾಕ್ಯ – ಸತ್ಯವನ್ನು ನುಡಿಯುವವರು

6. ಧೃಡವೃತ – ದೃಢ ನಿಶ್ಚಯ ಹೊಂದಿದವರು

7. ಚರಿತ್ರವಾನ್ – ಒಳ್ಳೆಯ ನಡತೆಯುಳ್ಳವರು

8. ಸರ್ವಭೂತಹಿತ – ಎಲ್ಲ ಜೀವಿಗಳ ಹಿತವನ್ನು ಬಯಸುವವರು

9. ವಿದ್ವಾನ್ – ಎಲ್ಲ ವಿದ್ಯೆಗಳನ್ನು ಬಲ್ಲವರು

10. ಸಮರ್ಥ – ಸಾಮರ್ಥ್ಯವುಳ್ಳವರು

11. ಸದೈಕ ಪ್ರಿಯದರ್ಶನ – ಕಣ್ಣಿಗೆ ಹಿತವಾದುದನ್ನೆ ಸದಾ ನೋಡಬಯಸುವವರು (ಕೆಡುಕನ್ನು ಹುಡುಕದವರು)

12. ಆತ್ಮವಂತ – ಧೈರ್ಯಸ್ಥರು

13. ಜಿತಕ್ರೋಧ – ಕೋಪವನ್ನು ಗೆದ್ದವರು

14. ದ್ಯುತಿಮಾನ್ – ಕಾಂತಿಯುಳ್ಳವರು

15. ಅನಸೂಯಕ – ಅಸೂಯೆ ಇಲ್ಲದವರು

16. ಕಸ್ಯ ಬಿಭ್ಯತಿ ದೇವಾಶ್ಚ ಜಾತರೋಷಸ್ಯ ಸಂಯುಗೇ – ಯಾರ ಕೋಪಕ್ಕೆ ದೇವತೆಗಳೂ ಹೆದರುವರೋ ಅಂಥವರು

ನಾರದರು ಪಟ್ಟಿ ಮಾಡಿರುವ ಈ ಹದಿನಾರು ಗುಣಗಳಲ್ಲಿ ನಿಮ್ಮಲ್ಲಿ ಎಷ್ಟು ಗುಣಗಳಿವೆ? ಪ್ರಾಮಾಣಿಕವಾಗಿ ಮೌಲ್ಯಮಾಪನ ಮಾಡಿಕೊಳ್ಳಿ. 16ಕ್ಕೆ 16 ಗುಣಗಳೂ ನಿಮ್ಮಲ್ಲಿದ್ದರೆ ನಿಮ್ಮದು ಆದರ್ಶ ವ್ಯಕ್ತಿತ್ವ. 10/16 ಆದರೆ ನೀವು ಸಜ್ಜನರು. 6/10 ಆದರೆ ನೀವು ಸಾಧಾರಣ ವ್ಯಕ್ತಿ. 2/16 ಅಥವಾ ಅದಕ್ಕಿಂತ ಕಡಿಮೆ ಬಂದರೆ; ಚಿಂತೆ ಬೇಡ. ಬದುಕು ದೊಡ್ಡದಿದೆ. ನೀವು ಈ ಗುಣಗಳನ್ನು ಮೈಗೂಡಿಸಿಕೊಳ್ಳಲು ಇನ್ನೂ ಸಮಯವಿದೆ; ಪ್ರಯತ್ನಿಸಿ.

ನೆನಪಿಡಿ. ಯಾರೂ ಅಧಮರಲ್ಲ. ಯಾರೂ ದುಷ್ಟರಲ್ಲ. ಮೂಲತಃ ಯಾರೂ ಕೆಟ್ಟವರಲ್ಲ. ನಿಮ್ಮ ನೈಜ ಗುಣ ಸದ್ಗುಣ. ನಿಮ್ಮ ನೈಜ ವ್ಯಕ್ತಿತ್ವ ಕುಂದಿಲ್ಲದ ವ್ಯಕ್ತಿತ್ವ. ಏಕೆಂದರೆ, ನಾವೂ – ನೀವೂ ಪರಮ ಅಸ್ತಿತ್ವದ ಪ್ರತಿಬಿಂಬಗಳು. ಪರಮ ಅಸ್ತಿತ್ವದಲ್ಲಿ ಚ್ಯುತಿ ಇರಲು ಸಾಧ್ಯವೇ ಇಲ್ಲ.

ಆದ್ದರಿಂದ, ಉತ್ತಮ ವ್ಯಕ್ತಿಗಳಲ್ಲಿ ಏನೆಲ್ಲ ಗುಣಗಳಿರುತ್ತವೆ ಎಂಬುದನ್ನು ಅರಿತು, ಸಾಧ್ಯವಾದಷ್ಟೂ ಅಳವಡಿಸಿಕೊಳ್ಳಲು ಪ್ರಯತ್ನಿಸಿ. ಸಂಗ್ರಹ=ಅನಂತ.ಎಚ್

*****